Skilmálar og vinnslusamningur

Drög, útgáfa 2026-10b. Lögfræðingur á eftir að yfirfara textann áður en kerfið er opnað almenningi.

Hlutverk

• Stofan sem skráir sig er ábyrgðaraðili sjúkraskránna sem hún færir, samkvæmt lögum nr. 55/2009 um sjúkraskrár og lögum nr. 90/2018 um persónuvernd.
• Vefhjálp, rekin af Guðna Má Ægissyni (kt. 010387-2139), rekur Stofuskrá og er vinnsluaðili. Vefhjálp vinnur aðeins með gögnin samkvæmt fyrirmælum stofunnar og til að veita þjónustuna.

Hvað Vefhjálp skuldbindur sig til

• Starfsfólk Vefhjálpar opnar ekki sjúkraskrár. Kerfisstjórn Stofuskrár sýnir stofur, notendur og reikninga, en engin sjúkragögn.
• Gögn hverrar stofu eru aðskilin frá gögnum annarra stofa.
• Gögn eru geymd á netþjóni Hetzner Online GmbH í Helsinki í Finnlandi, innan Evrópska efnahagssvæðisins.
• Öll innskráning krefst tvíþættrar auðkenningar, og allur aðgangur að sjúkraskrám er skráður.
• Öryggisbrot sem varða gögn stofunnar eru tilkynnt stofunni án ótilhlýðilegrar tafar.
• Undirvinnsluaðilar:
  • Hetzner Online GmbH, Þýskalandi: hýsing netþjóns og gagnagrunns í Helsinki í Finnlandi.
  • Nova hf., Íslandi: sending SMS-áminninga og innskráningarkóða (símanúmer og texti skeytis, aldrei heilsufarsupplýsingar).
  • SendLayer: sending tölvupósts (netfang og texti, aldrei heilsufarsupplýsingar).
  Stofunni er tilkynnt um breytingar á undirvinnsluaðilum.

Hvað stofan skuldbindur sig til

• Að veita aðeins starfsfólki aðgang sem á rétt á honum, og loka aðgangi þegar starfsmaður hættir.
• Að virða rétt skjólstæðinga, meðal annars til aðgangsyfirlits og takmörkunar aðgangs.

Áskrift og uppsögn

• Fyrstu 14 dagarnir eru endurgjaldslausir. Áskrift hefst aðeins ef stofan staðfestir hana sjálf (Stofan → Áskrift); annars lýkur aðganginum þegar prufutíma lýkur, án rukkunar, og gögnin eru geymd. Eftir staðfestingu er rukkað mánuð í senn, fyrirfram, frá þeim degi sem prufutíma lýkur (dæmi: prufutíma lýkur 15. október, fyrsti reikningur nær yfir 15. október til 14. nóvember). Uppsögn gildir út tímabilið sem greitt hefur verið fyrir. Verð samkvæmt verðskrá: 14.990 kr. á stofu og 1.990 kr. á hvern notanda umfram einn, án VSK.
• SMS eru rukkuð sérstaklega, 12 kr. án VSK fyrir hvert skeyti, og bætast við næsta reikning eftir á. Skeyti sem send eru á prufutíma eru ekki rukkuð. Eitt skeyti rúmar 160 stafi án íslenskra stafa en 70 stafi ef textinn inniheldur íslenska stafi (til dæmis á, ð, þ, æ, ö). Lengri texti skiptist í fleiri skeyti og er hvert þeirra rukkað. Engin sending verður lengri en 4 skeyti; lengri texti er sendur án íslenskra stafa og ef hann rúmast ekki samt er hann ekki sendur. Undir þetta falla áminningar, tilkynningar um tíma, prufuskeyti og innskráningarkóðar á Mínum síðum. Tölvupóstur er innifalinn.
• Engin binding. Við uppsögn fær stofan öll sín gögn afhent, og þeim er síðan eytt hjá Vefhjálp nema lög krefjist annars.